<< L A D Y R O S E . >>

1.
Or’ cu l’embiu cume di prima
Vogliu quantunque fànne sente
Ch’o n’avia tamanta stima
Per LADY ROSE sempr’attente
Quandu di fattu mi parlava
Di `ssa Storia chi nun stanciava .
2.
Parechje volte cu passione
`Ssi scärtafacciuli leghjia
Accabata nu `sse stundone
Cu l’ora prestu chi sfughjia
E tandu dopu ne cuntava
Per casu cio ch’ella truvava .
3.
Ci n’ha scrittu O! di siguru
Ma `ssi libri per a Corsica
Dicendune cusi sippuru
Chi di bellezza ci ne spicca
Tramezz’a `ssu Mondu bè stranu
Nu `ssu situ magar’anzianu .
4.
`Ssa signora di mintuàlla
Ghjé un duvere chi mi preme
Nun mi stancava d’acustàlla
Pe’ discutànne senza teme
Sentendulla da pett’a pettu
Cu i so’ detti di l’allettu .
5.
Mazzeri Finzioni Signadori
Ci n’ha spiegatu tante cose
Cusi per stintu di l’onori
Nu parulle maravigliose
Po’ di DE PAOLI cu storie
Testimugnendu e so’ glorie .
6.
U so’ bellu libru sputicu
San’e santu di rinoma
Or’ per l’ Isula di granitu
Tracärcatu soga di soma
Nu tanti loghi cunnisciutu
Cu lettura ghjé ritenutu .

7.
Nimu perciondi si scurdera
Cum’ell’era quessa l’inglese
Chi sempre bè ci ramentera
E so’ brame d’ogni paese
Trapughjendu nu `ssi rughjoni
Di l’anticoni cu machjoni .
8.
Chi `ss’ajaccina ma di core
Per di l’ammente ne firmessi
Cu `ssu nome s’ell’un pò more
Nu `ssa Corsica si ne sapessi
L’ha dichjarati pur’a tutti
Per di più tanti bon’ prudutti .
9.
`Sse stantare di Filitosa
Per di richezza nu `ssu Mondu
Cu FREDERICA ROSE famosa
Ne francanu da `ssu circondu
Spärghjendune tanta qualita
Tramandata cu l’antichita .
10.
Signurona cu a famiglia
Di BONAPARTE pe’ vantànne
Li ne premia `ssa sumiglia
Cusi di prima pe’ campànne
Chi riverita cu l’amore
Ne pudia probiu discorre .
11.
Circhendu `sse vechje vistighe
Cu franasia s’appigliava
Senza lagnàssi di fatighe
DOROTHY CARRINGTON chi stava
Cu `ssa vita tant’ inzirmata
Di più sebbiata po’ stimata .
12.
Di `ssa listessa Dinastia
Cu `ssi STUART sapendu bè
Mi ne disse `ssa parentia
`Ssa cugina lungana per me
Chi di veru pien’ di rispettu
Scrivu ste lode cu l’affettu .

== JAMES STUART .. 24-03-2010 . ==