<<< CU BABBONE . >>>
………………………………

Mi ne ‘ncoru be’ creaturu
Spassigghjendune cu Babbone
A cavallu per di siguru
In groppa di u so’ bastone .

Cu a mazzetta tand’ a puntu
Per staffile o per i sproni
Ch’o cappiava solu ‘juntu
In casa stancu stäscinoni .

A bighjànne a u fugone
Nu quella sala bughjicosa
Ci si stava tante stundone
Cu a lumera bagliulosa ,

E cu ‘ssu testu a l’approntu
‘Sse fasgiole probiu pe’ dîlla
Bi n’accunciavanu per contu
Nu ‘ssa nuttata pe’ finîlla .

O puru cusi be’ da veru
Ma cu ‘ssu ‘rocciu quelli nicci
Chi cu l’untu nant’a ‘ssu ferru
Eranu cotti cume ricci .

Per di più mi ricordu tantu
In stanza cu u mo’ letucciu ,
Or’ quandu Babbone accantu
Mi dicia : < Dormi , O ! ciucciu > .

Po’ quantunque chi cu manera
Magaru tandu affiachitu ,
Impruvisava in preghera
Fijatu si cum’ accanitu .

A matina a l’alba rittu
Nu ‘ssu purtellu s’affaccava
E in purpitru zittu zittu
Cu gran’ passione impinnava .

O ! quante volte ne scrivia
Canzone per u festulaghju
Cu sunetti o puesia
Avà soga nu fumicaghju .

Pe’ dîmmi e più belle fole
O nemenu quelli malfatti
Appussati be’ cu ‘ssu sole
In in cantu si , ciatti ciatti ,

Quante stonde ci si passava
Eju sempre pe’ dumandàlli
In ‘ssu mentre chi nun stanciava
Ancu pe’ sente i missali .

Di più spessu ci pensu dinu
Quandu tramindui a pusà
Nant’ u scalo’ di u vicinu
Si stancava tant’ a muvrinà .

Cu a so’ pippa imburrata ,
Ellu si chi d’ ërba tacacca
Pe’ zuccànne quella manata
N’ avia pienu a so’ stacca .

Un mi scordu di ‘ssi ‘jorni ,
Da zitellu , a ‘ssa sulana ,
In paese o per ’ssi forni
Nu ‘ssu frescu di a funtana ,

A l’umbriccia di un pullone ,
Saltichjendu per quelli chjassi
Po’ cusi appress’ a Babbone
Senza cuntànne I mo’ passi .

Per l’ Oliva in quell’ umbria
Cu a statina ogni mane
Ma cun ellu ci si vulia
Ghjunghje be’ sin’ a ‘sse funtane ,

Induv’ ellu rincheria
O ! luntanu di tanta jente ,
Pe’ rifiatàssi una cria
Cu quell’ acqua fresca surgente .

Inseme sempre accuppiati
Nu ‘ssi loghi di gran’ friscura
Tandu si chi puru sebbiati
Ci si stava senza primura .

°°°°°°°°°°°°°°°°°°°°°°°°°°°°°°°°°°°°°°°°°

= JAMES STUART . 21 – 1 – 1969 . =

( per u mo’ ziu Camellu FILIPPI )