- Puesia di Rinatu Coti

Cù piaceri

À la funtana ghjandiva
L'acqua linda biarè
Sott'à lu fugliamu frescu
Una stonda pusarè
È la torma di l'aceddi
cù piaceri sintarè.

À la cicuta nuciva
Lu so filu tagliarè
Sott’à l’alzu spuntanatu
Lu criscionu truvarè
È varchendu la vadina
Cù piaceri saltarè.

À la vindemia tardiva
Ogn' annu andarè
Sott'à lu soli ardenti
A bedd' uva cugliarè
È lu mostu di l'annata
Cù piaceri tastarè.

À la staghjoni gattiva
Lu so nasu turciarè
Sott'à l'anticu pilonu
Di notti ti vardarè
È la fucata di scopa
Cù piaceri gudarè.

À la mirenda fistiva
Bon bucconi manghjarè
Sott'à lu celi splindenti
Una sunata farè
È la paghjella schirzosa
Cù piaceri cantarè.

Rinatu Coti